早兩日,嚴伯仲喺度打聽緊「嬉孖屐」屬下記者嘅情況,期間已八到啲唔係幾好嘅消息,點知今朝一開機,就已經收到佢哋正式將旗下刊物摺埋同重組嘅 email 公告,終年 24 歲。傷感梗有啲,畢竟自己係記者出身,近日連續多間傳媒宣佈要減薪放假瘦身,老闆要出唻 ngai 契弟,甚至要收檔。一場武肺嘅傷害有如核電廠大爆炸,你以為你住得遠就無事,點知啲核幅射已經搞到你周身 cancer,瞬間毒發身亡。
點解各行各業變得咁不堪一擊呢?係咪過去十年八載個泡沫吹得太大呢?係咪有咩人做得唔好呢?無理由架,自從海嘯之後監管機構大過天,乜叉都管,市場應該好健康發展,好有抵禦能力先啱。但偏偏大家計漏咗,亦都唔察覺,全球人類,不論有錢無錢,大家嘅價值觀不斷改變,或至少大家喺買產品、買資訊、買服務嘅價值觀正在改變,然後喺武肺助攻下,導致咗呢場市場大災難。
嬉孖屐旗下品牌,同其他國際級或地區級嘅專業財經雜誌,一直都係以寫俾行內人睇,大家互相正面地、專業地研究探討,表揚一番,好幽雅地維護個市場生態,好高尚地繼續做生意。一本 buy side 唔夠整多本 sell side;嫌講「金融業」三個字太空泛,一於拆到好細,一啲講財資界,一啲講債市,一啲專講啲退休基金點樣投資,總之品牌林立,要幾專有幾專。於是間間大家公司 reception 後面個架都有來自呢啲雜誌頒嘅乜乜大獎,報紙架上又有自己 CEO 封面人物專訪,當然裡面仲有更多行內人覺得有用嘅資訊,喺行內,喺公司內不斷流傳,成為金融界茶餘飯後,甚或要同人攀談時嘅話題。
佢哋嘅成功模式一直都被本地媒體集團仿傚。甚至「紅早」近幾年都好活躍,同好多大公司簽長約,搞一整年嘅系列 forum,啲人為咗可以識人,搵 connection,爭住俾錢去 join,識唔到人打個卡 sel 個 fie 都好。又好似誠哥台、石 sir 報等等一直都有做開,搵到錢分分鐘夠養埋編採部。
喺好景時,金鐘中環嗰幾間專做財經活動嘅酒店,你想搵日搞個 event,你最好兩年前唻 book。連帶財經公關公司,好似我呢啲 in house 公關,做 event 嘅,做 deco 燈光音響攝影後期嘅,做飲衫做 corp gift 嘅,連啲唔啦更但總之同錢有關嘅行業都加入埋一齊,做大個餅,甚至連啲過氣主播,同啲存心呃人嘅江湖術士蛇蟲鼠蟻都可以養活埋。仲記唔記得嚴伯講過喺籮冰甜做時,成日都遇到啲大陸佬,話自己係國家邊個部門嘅直屬傳播單位唻搲專訪,喂佢雖然呃你,但如果你肯俾錢,佢都真係會印幾百本廢書俾你派街坊,廢極都算係傳播事業呀大佬。
近十幾年,有啲外媒唔做記者,走去做行家 directory,做 news clipping / search analyst,又 AI 又 Big Data 又呢呢嚕嚕,幾多大公司排隊俾錢落疊,搵錢方式千變萬化,於是乎成個經濟圈,或者講白啲,成個食物鏈幾咁豐富同健全。一諗起個璀璨景象係幾咁璀璨,對比而家武肺導致產業鏈崩潰,啲公司會無啦啦打唻關心你會唔會 cut service,出唻見個面都要限人數,頒獎唔得,合照唔得,飲宴唔得。要幾咁欷歔就有幾咁欷歔。
成個行業可以頂幾耐? 問心,訂閱人數 80萬,收視過千萬,點擊率過億,so what ? 又回帶到海嘯時,嚴伯任職機構個老總講過,當時間公司最少每日要實收 100 個。打開張 rate card,啲價錢愈做愈平,平到無人要。做過傳媒都知,你唻落廣告,rate card 牌價一個錢,但實收分分鐘一半都無,又要打折頭,又要送番唔知呢樣嗰樣,扣番啲人工成本,一日 100 個?老老實實,100 個橙都未必收到呀。
就算個市好番,啲人仲會否咁樣使錢?有自欺欺人嘅 social media,自己 sell 自己,既可慳番一大筆廣告費,仲唔怕被人寫衰。嗰幾個大網主發過豬頭同時,仲可能因為你個 page 多人睇,分番一個幾毫俾你擦存在感。你話唔係喎,正所謂文章有價,準確、公正、客觀嘅新聞資訊更加值千金啦。但可惜嘅係,道德歪風吹遍全球,癲狂領袖一句 fake news,對自己不利就話傳媒錯,成千上萬愚民鸚鵡學舌,搗毀咗幾多傳媒人嘅心血;再唔係好似某個國度咁,十幾億人一齊扮傻,一齊每日睇同幾篇報道,只係唔同地區唔同網就唔同報頭,唔啱聽唔啱睇嘅一律封殺。
你會問,以前咁好,不如大家一齊返番舊經濟,返番酒店衣香鬢影,返番幽雅高尚得嗎?無自由無真相無進步無廉恥無互信嘅社會,點可能幽雅高尚,點可能有高質資訊,點可能有豐富食物鏈。有嘅,只係一蟹不如一蟹,只係繼續沉淪。如果可以嘅話,最少都要返番戰後,我外公喺港澳《華僑日報》執字粒時,一切重頭唻過。
(網上圖片)