[2007 JUL 09] 對廣播處長朱培慶先生要求提早離職，同埋今日出唻見傳媒嘅表現，感到極之失望。
我覺得，無論做錯咩，終歸都係一個部門領導。行出唻見人，點都應該保持住一個資深公務員應有嘅態度。如果未準備好，大可以繼續唔蒲頭，無人會怪你。你既然行得出唻，將件事定性：上周「私人聚會」唔涉及港台運作、無收受利益，大家付費、唔係因為呢件事而達致今日決定、已經向家人交代。咁樣，件事係咁多就係咁多。
點解要繼續自我引爆，人哋撩你講嗰日件事，你表現得耿耿於懷，問非所答，欲言又止？點解唔借呢個機會，扭轉形勢、轉移焦點，將大家視線或者個 agenda，帶返去港台前途度？點解唔提醒大家，錯嘅結果可以係改，而唔一定係死？你就咁行咗去，對得住港台員工同家屬，以及支持港台繼續營運嘅廣大市民咩？
我哋嘅行家，同埋各大傳媒老問，到底幾時先肯收手？幾時先肯正正經經做新聞？已經做咗咁多日「頭二三」，點解仲要重覆問處長「去嗰度係咪去接受性服務」、「向太太道歉係咪即係承認嫖妓」？知道咗對個社會有咩益處？係咪做記者就大哂？作為處長，點解你要買呢啲垃圾問題怕？點解要俾問呢啲問題嘅記者逞強？點解要 CUE 呢啲 SOUNDBITE 出街？
明知唔會答嘅問題，記者強要問，即係要被訪者難堪。敢問係咪要一直迫到喺港台前途問題當中，肩負關鍵角色嘅朱處長，話「冇錯，我俾咗幾千蚊嗰位小姐，同佢達成一個協議，就係我哋去一個雙方協議嘅場地，然後我會同佢發生性行為，將我嘅陽具放入佢陰道內，然後獲得快感」先覺得任務完成，為爭取市民知情權立咗大功？
點解無人問，件事而家咁樣應該點樣補飛？點解無人問，政府有冇借事件向處長施壓，從而達到陰乾嘅目的？點解每次有官員出事，永遠只識問人辭唔辭職，而唔睇下件事有冇得補救？個個都轟哂落台，仲有邊個可以做嘢？
作為一個低薪、無地位、得唔到公眾認同、在某啲階層人眼中同過街老鼠無異嘅傳媒工作者，今日出到位，對自身，對呢行又有幾多長遠好處？！點解唔借呢個機會撥亂反正，而係選擇繼續墮落。連唇亡齒寒嘅行家都只係同街邊八公八婆一般見識，分唔清「應該知」同「想知」，難怪有港台人話，香港人根本就唔撐港台。
對港台唻講，今日係黑暗嘅一日，對傳媒亦然。我對我作為傳媒一份子，感到非常羞恥。
zone BH 